ein stökske historie van de vereniging
4 x 11 jaor vastelaovesvereniging de bôkkeriejers Ein kort euverzich van ’t wel en wee van vastelaovesvereniging de bôkkeriejers bie gelaegenheid van ‘t 4 x 11 jaorig bestaon gesjreve door Groatvors Jan. ’t Begin. Op zaoterdig 7 december 1962 kome de lede van voetbalvereniging “Sjöt In” bie Sef vanne Kuuper bie ein ôm veur de lèste kieër same te vergadere. Voetbalvereniging “Sjöt In” woor ein kefee-voetbalclub die, zoa es men det toen numdje, wildj voetbal speeldje. Dao woor van de voetbalbondj oet ein sjrieve nao eeder voetbalclub gestuurdj det dit wildj voetbal neet mieër moogdje. Ze dreigdje det ze oos anger voetbalclub, V.V.S., woo weer nogal get spulle van hawwe, zoewe beboete of zelfs oetsloete van kômpetiesie- voetbal. Weer môste dus jaomer genôg mit oos sjpas-voetbal stoppe. Omdet weer nogal get spulle hawwe, zoa es truis, eine bal en ein paar gölje in de kas en veural väöl doos, kome weer effekes bie ein ôm te kieke waat weer mit al die dinger ginge doon. Wie weer bie Sef nao achter ginge ôm te vergadere, troch Sef ôs aan ooze jas en zag: “maaktj d’r mer ein vastelaovesvereniging van”. Wie weer toen nao ein gooj oer oetvergaderdj woore waas voetbalvereniging “Sjöt In” ter ziele en woore de Bôkkeriejers gebaore. Weer hawwe allein nag gein bestuur. ’t Bestuur van fluit- en trômmelkorps St. Joris, die dao auch vergaderdj hawwe en die aan ’t bufet nag get aan’t naovergadere woore, det reikdje oos de helpendje handj. Ze goove zich mit veer man plus de kastelein op es bestuur. Vanaaf det moment begôs de zaak te drejje, ein waek of nege veur vastelaoverszôndig. Mer leef luuj, det is eeder gezag es gedaon, dao koom van alles en nag get op ôs aaf. Neemes van ôs haw eeder mit dte vastelaovesbielke gehaktj. ’t Is ech geine kattedrek ôm ein ganse nuuj vereniging oet de grôndj te stampe op zônne korte tied. Door ein geweldige samewèrking tösse ’t bestuur, de lede en de St. Joaster bevolking is alles op zien puêtjes terech gekômme. Ein volledig vastelaovesprogramma is det ieëste jaor de revur gepasseerdj. Ooze ieëste prinsematinee dae es titel mit kreeg “eindelik, St. Joas weurdj wakker” woor ein groat spektakel. En toen woor ’t zoa wiet det ooze ieëste prins gebaore zoew waere. Hae koom oet ein bèd, (mit vertraging want de wèkker leep neet aaf). Door alle commosie euver dae wèkker leet de prins zich met oet ’t bèd valle. Ooze ieëste prins woor bekindj, Prins Graat I, en St. Joas woor in eine kiër klaorwakker. Dao môs nag van alles georganiseerdj waere nao det prinsebal. De raod van èllef  en ’t bestuur woore al in tenue gestaoke. Dit woor op eine zieër korte tied gerealiseerdj door Thea Bakkes. Vanaaf het begin woor al aafgespraoke det vanaaf ’t ieëste jaor auch eine optoch door ’t Bôkkeriejersriek zoe trèkke en det brach nag al get werk mit zich mit. De inwoners werm make ôm mit te doon, zellef eine prinsewage make (det gebeurdje toen mit get sjotte, pekskes struê en golfkartôn) en gank zoa mer door. Door de geweldige mitwèrking van de St. Joaster bevolking trog dit ieëste jaor al eine sjoane optoch door ’t dörp, allein woor det get min meziek. Oos st. Joaster meziekvereniginge stônge al örges anges ônger kôntrak ôm zich eine gölje bie te verdeene. St. Joas is op dit moment nag stieëds klaor wakker. Door de jaore haer höbbe weer det vastelaovesbuêtje drievendje wete te haoje, mit hieël väöl steun van oos damescomité, det op al oos aktiviteite flink de henj oet de moewe môt staeke. In ’t jaor 1969 höbbe weer de ieëste kieër de optoch aaf môtte lasse. De waergode woore ôs neet good gezindj. Vastelaoveszôndig loog de snieë in St. Joas bienao toet aan de hoesnummer. De gemèndje kôs de waeg neet vlot genog vrie make zoadet geine optoch kôs trèkke. Daobie hawwe weer ein gelök bie ein ongelök, want waat woor ’t geval, ooze prinsewage haw eine kepotte bndj. Dao koome weer pas achter wie weer op maondigmörge de wage aaf wôlle braeke. Es weer dae bandj sôndes hawwe môtte reparere, den hawwe weer de halve wage aaf môtte braeke. De res van de fieëstelikhede is det jaor gewuên doorgegange, al môste weer ôs de stevele aandoon ôm gein naate veut te kriege. Prins Jo I is vanaaf det moment door ’t laeve gegange es ooze snieëprins. Bie oos 33-jaorig bestaon krege weer bie oos aktiviteite hieël väöl muzikale ôngersteuning van oos eige kloonekepèl. Op de meiste St. Jaoster vastelaovesaktiviteite en op de sleuteleuverdrach kôste weer raekene op de mitwèrking van de klonekepèl. In de jaore sevetig zeen weer biej väöl aktiviteite zoawie receptie en sleuteleuverdrach ôngersteundj door de St. Joaster kepèl “De Koperblaozers”. Zoa zeen de jaore langsaam mer zeker, mit veur en taegespoed aan ôs veurbie gegange. Door de jaore haer zeen weer versjillende kieëre van verenigingslokaal môtte verangere. Van de Kuuper ginge weer nao Oase, nao ’t gemeinsjapshoes, nao Jan van Pie, nao Broer van Wiene en noe zitte weer al ein aantal jaor biej Paula en Jos. “t Leedebestandj van oos vereniging woor neer altied optimaal. Op de kritieke momente woor der echter altied ein oplossing veur henj. Zoa landje weer mit valle en opstaon in het jaor 1980. Det is ein hieël kritiek jaor gewaes veur de Bôkkeriejers. Oet noat waerdje Peter Ernst veur de twieëdje kieër prins. Det woor waal nieks nuuts want Jo Ruijten en Lei Pelsers woore det auch al twieë kieër gewaes. In 1980 loog ’t echter anges. Weer hawwe väöl te min lede om de vastelaovendj mit in te gaon. Weer höbbe toen eine breef door ’t dörp gestuurdj  ôm de St. Joaster miense weer werm te make veur de vastelaovendj en de vastelaovesvereniging. Weer hawwe ein bie-einkôms georganiseerdj in ’t Trefpuntj veur alle st. Joaster miense die de vastelaovendj ein werm hert toedroge. Op dees bie-einkôms versjene twieë miense, eine woor van de carnevalsvereniging van ech en dae angere koom oet hoofde van zien functie es gemeinteraodslid. Weer höbbe toen ôndanks de slechte opkoms toch weer alles door laote gaon, en det haet ôs zeker gein windjeier gelag. Vanaaf 1981 zeen weer d’r es vereniging weer gans baovenop gekômme. De zake waerdje op ein anger meneer aangepaktj. De aoj wieverbel ginge langsaam met zeker ter ziele, mer de nuuj aktiviteite van de vastelaovesvereniging zoa es de St. Jaoster revue (veur de ieëste kieër in 1984 bie ‘t 2 x 11 jaorig jubileum) en de leedjesaovendj kinne häöre weerga neet. Ein anger bewaoge jaor woor 1991. Prins Bas dae in det jaor de St. Jaoster vastelaovendj veurop ging dae waerdje geconfronteerdj mit de naoweeje van de golfoorlog. De burgemeister en zien adjudante die hawwe gehuêrdj en gelaeze det de groate Duitse carnevalsvereniginge de zaak hawwe aag geblaoze in verbandj mit de golfoorlog. Versjillendje anger vereniginge oet de buurt hawwe dit veurbeeldj euvergenômme. Alle echter vastelaovesvereniginge waerdje op ’t gemènjehoes ôntbaoje veur ein gesprek mit de hoag hieëre. Dao koom oet de bös det de bestuurders leever hawwe det alle boeteaktiviteite gesjrapt zoewe waere in verbandj mit meugelikke aanslaeg van extremistische terroriste. Dao wardje dus beslaote det de optochte en de sleuteleuverdrach neet doot zoewe gaon. In St. Joas zeen alle anger aktiviteite toen waal doorgegange, mit op vastelaoveszôndig eine daverendje vastelaovesmatinee. Oos prinsepaar Bas I en Ine waerdje door de buurtbewoners in optoch mit meziek van de klonekepèl nao ’t Trefpuntj gebrachtj, op ein slei. Prins Bas waerdje in 1992 nag mer èns toet prins gebombardeerdj ômdet in 1991 toch alles ein bietje anges woor verloupe es in ein “normaal” vastelaovesseizoen. Ein groat hoagtepuntj woor verder de viering van oos 3 x 11 jaorig jubileum. Same mit oos prinsepaar Ton II en Willemien höbbe wer der ein geweldig jaor van gemaaktj. ’t Woor ein groat dörpsfieës en wer höbbe in det jubileumjaor de bleumkes eine extra sjeut water gegaeve. Noe gaon weer den van’t 33e jubileumjaor verder nao ‘t 44e jubileumjaor mit ein beknoptj verslaag. Wanr nao zoa ein geweldig 33e jubileumjaor is de kans groat det de animo en de gedrevenheid op ein lieëg pitje kömtj te staon, mer det is ôs gelökkig gespaardj gebleve.  Want ooze 34e prins waas nemes anges es Hans Heuvelmans dae same mit zien prinses Nicole de vastelaovendj op st. Joas eine extra stimulans goof mit zien grappe en grolle. En zoa zeen weer op de zelfdje voot kinne doorgaon ôm ’t vastelaovesfieës in St. Joas op peil te haoje. Nao Hans koom Lei oet de hoage hood te veursjien. Lei Hilkens mit zien prinses Marlies, eine sjeut in de roas. Want ônger hun leiding leep ’t allemaol gesmeerdj! Doe koom de jeug aan de beurt, Stefan Metsemakers mit zien prinses Lilian. En auch ônger hun leiding waas ’t op en top vastelauvendj op St. Joas. Dao nao versjeen Frank Thoolen mit zien prinses elianne aan ’t firmament. En auch mit die twieë veurop leep ’t wie eine trein. Doe waas ’t de beurt aan Sjack Bakkes en prinses Anita die mit väöl tam tam en meziek der get sjoans van wiste te make. Dao nao woor John Rohs aan de beurt mit prinses Jeanette. Die twieë höbbe op ein prachtige meneer dae vastelaovendj op St. Joas aan’t drejje weite te haoje. Dao nao versjeen der eine boetelenjer aan de horizon, dae ze op St. Joas ingekwarteerdj hawwe.René Simons dae mit zien prinses Iréne de vastelaovendj in St. Joas ein geweldig Belsj tintje haef gegaeve, amai, amai, amai. Doe waas ’t de beurt aan Adrie Rohs mit zien prinses Sandra. Adrie, dae nao ein zwaor ôngelök zich weer op de bein haw gewèrktj, en dit vierdje door op St. Joas es prins Adrie de vastelaovendj op ein grandioos meneer veur te gaon.Dao nao koom Fred Dalemans mit prinses Danielle die ’t vastelaovesgebeure op St. Joas in ein waord geweldig höbbe gemaaktj. Es 43e prins woor dao Edwin Groenewald dae same mit zien prinses Nicole, es inwoners van Pey, op St. Joas de bleumkes flink boete höbbe gezatj en auch flink naat höbbe gehaoje. Noe zeen weer den aangelandj in oos 4 x 11 jaorig jubileumjaor. Same mit ooze jubileumprins Erwin I en prinses Patricia gaon weer d’r eine spetterendje vastelaovendj van make. Weer wille alle Bôkkeriejers en Kroekestöp, groat en klein, die al die jaore höbbe mitgewèrktj ôm det volksgebeure in oos dörp toet zoa ein geweldig fieës te make,herstikke bedanke veur de steun dae weer al die 44 jaor höbbe moge kriege. Wo is dae tied toch gebleve en waat is in al die jaore neet verangertj. ’t Spraekwaord zaet “neet achterôm kieke, mer veuroet”. Weer wille oos beide prinsepare en de ganse St. Joaster Bôkkeriejers en Kroekestöp einegrandioze jubileumvaste-laovendj toewinse. Alaaf
truuk